venerdì 10 novembre 2017

Vincíu Musumeci: la Sicilia torna sutta lu Centru-destra, “Dedicu sta vittoria a li me' figghi, vogghiu èssiri lu prisidenti di tutti li siciliani”


Urigginali di Caitanu Luca La Mantia - 6 nuvèmmiru 2017 - Funti: Jurnali di Sicilia

PALERMU - Nta lu 2012  avía pirdutu lu cunfrontu cu Crucetta, pagannu li cunziguenzi dâ divisioni ca s'avía furmatu dintra lu Centru-destra. Ma doppu 5 anni (e na trattativa chi durau assai) Neḍḍu Musumeci (talianu: Nello Musumeci) fu capaci di rijúnciri lu Centru-destra dunannu la cumferma di tutti li sunnaggi chi lu vidíanu comu vincituri nta la scalata pû guvernu dâ riggiuni. Scalata ca li riniscíu ô terzu tintativu (iḍḍu s'avía già cannidatu nta lu 2006) e cu na pircintuali c'arrivàu a tuccari lu 40%. 

“Vogghiu èssiri lu prisidenti di tutti li siciliani - cummintau Musumeci -, di tutti chiḍḍi chi mi vutaru e mi dèsiru sustegnu e macari di chiḍḍi chi vutaru pi àutri cannidati o nun vutaru propiu. Vogghiu didicari chista me vittoria ê me' figghi e a li figghi di tutti li siciliani, picchí iḍḍi ànnu dirittu a lu megghiu futuru.”

Pi Neḍḍu Musumeci chistu votu àvi un significatu ca nun si limita sulu a li cunfini  dâ Sicilia. “Chistu e’ un risurtatu c'àvi mpurtanza nazziunàli – cummintau Musumeci -, lu centru-destra turnàu nzèmmula e grapríu la strata pi n'appuntamentu puliticu assai mpurtanti chi nta la primavera chi veni avissi a dari all'Italia un guvernu dignu di stu nomu.” Accussí Musumeci cummintau li risurtati di l'ilizziòni a Catania (unni ci sta la sedi di lu so cumitatu) dichiarannu ca “nta lu Labburatoriu Sicilia chistu spirimentu jìu bonu. Comu prisidenti dâ Sicilia, lu me primu cúmpitu e’ chiḍḍu d'arricupirari ḍḍu 50% di siciliani ca nun vosi vutari.”

Neḍḍu Musumeci nascìu a Militeḍḍu, lu 21 jinnaru di lu 1955. Lu so arrivu a Palazzu d'Orleans rapprisenta lu puntu cchiù àutu di la so carrera pulítica e l'urtimu appuntamentu ilitturali so, comu iḍḍu stissu dichiaràu quarchi jòrnu prima di l'ilizzioni ntôn foru dû Jurnali di Sicilia. La so fu na campagna ilitturali mmilinata e chi vitti nu saccu di crítichi supra li “listi mprisintàbbili” chi vínniru di li so' abbirsari pulítici.

“Nu saccu di mali palori e mali figuri mmilinaru chista campagna ilitturali – cummintau Musumeci -, ma tuttu chistu uramai e’ acqua passata. Accamora sentu 'n coḍḍu di mia lu pisu di na granni rispunzabbilitati. Sugnu sicuru ca àiu a 'ffruntàri nu saccu di prubbremi chi ànnu a chi fari cu la drammatica situazziòni dâ me terra, cirtamenti la situazziòni cchiù difficili nta 70 d'autunumía.”

Musumeci, jurnalista pubbricista e lauriatu 'n Scenzi dâ Cumunicazziòni, travagghia comu mpijatu bancariu nta lu Gruppu Unicredit. Già quannu era giuvinottu s'avía appassiunatu a la pulítica, tant'e’ veru ca già a 15 anni avía trasutu nta l'urganizzazziòni giuvanili di lu MSI canusciuta comu “Giovane Italia”. Quannu avía sulu 20 anni, fu cunziggheri cumunali prima nta la so citati, poi macari nta li cumuni di Gravina dî Prachi e Jardinèḍḍi. A 32 anni addivintau sicritariu pruvinciali di lu MSI a Catania e cunzigghieri pruvinciali nta sta pruvincia di lu 1990 sinc'a lu 1993. Nta lu 1994, si cannidau comu prisidenti di la pruvincia câ lista dû Muvimentu Suciali Talianu e vincíu ô balluttaggiu cuntra di Steliu Manciameli (talianu: Stelio Mangiameli). Musumeci fu prisidenti di la pruvincia pi nov'anni e fu ricumfirmatu ô primu turnu cu 310000 priferenzi.

Sempri nta lu 1994, si cannidau comu èuru-parlamintari cu Allianza Nazziunali pi la circuscrizziòni “Italia miridiunali”, e vinni ricumfirmatu nta lu 1999 e lu 2004. Lassau Allianza Nazziunali nta lu 2005 a causa di calipini chi juntàru ô chianu cu Gianfrancu Finị, e funnàu l'”Allianza Siciliana” chi era un muvimentu autunumista di destra pi lu quali Musumeci si cannidau l'annu doppu pâ prima vota a la prisidenza dâ Sicilia. Tannu Musumeci avía pigghiatu lu 5,3% dî voti contra lu 53,1% di Totò Cuffaru (cannidatu pi lu centru-destra) e lu 41,6% di Rita Burzillinu (talianu: Rita Borsellino - cannidata pi lu centru-sinistra).

Ntô 2008 Musumeci pigghiau parti a n'àutra mpurtanti cumpitizzioni ilitturali, chiḍḍa di l'ilizziòni cumunali dâ citati di Catania. Tannu avía vinciutu ô primu turnu lu cannidatu dû centru-destra Rafaeli Stancaneḍḍi (talianu: Raffaele Stancanelli), cu tuttu ca Musumeci avía pigghiatu lu 25% dî voti cû sustegnu di na lista civica. Doppu l'ilizzioni, Allianza Siciliana addivintau parti dû muvimentu La Destra ca pi n'annu appi comu so vicisicritariu nazziunali propiu Neḍḍu Musumeci. Ntô 2011, duranti lu guvernu Birluscuni, Musumeci fu numinatu suttasicritariu pô Ministeru dû travagghiu e dî pulitichi suciali. Ntô 2011 Musumeci si cannidau pâ sicunna vota ô guvernu dâ Sicilia, ma macari tannu nun arriniscíu a júnciri a Palazzu d'Orleans a causa di la vittoria di Rusariu Crucetta (talianu: Rosario Crocetta). Pirò arriniscíu a uttiniri un postu a la Junta Riggiunali Siciliana unni fu capu dâ Cummissioni Antimafia. Ntô 2015 lassau La Destra pi funnari n'àutru muvimentu, chiamatu #Diventeràbellissima. Oi, Neḍḍu Musumeci addivintau prisidenti dâ Sicilia a quasi 63 anni.

Traduttu di: Franciscu Prucopiu


Licenza Creative Commons

domenica 27 agosto 2017

Ritruvatu lu vinu cchiù anticu dû munnu, àvi quasi 6000 anni


Urigginali di ANSA - 25 agustu 2017 - Funti: Jurnali di Sicilia

Àvi 6000 anni lu vinu talianu cchiù anticu dû munnu: la so' fezza fu ritruvata dintra di 'na giarra chi arrisali all'Etati dû Rami e fu truvata nta na grutta vicinu Girgenti di un gruppu 'ntirnazziunali di ricerca. Lu rispunzabbili di chistu gruppu e’ Dàvidi Tanasi (talianu: Davide Tanasi), chi travagghia pi' l'Universitati di la Ciùrita Miridiunali (n ingrisi: University of South Florida) e nzemmula a iḍḍu pigghiaru parti â ricerca lu Cnr (Cunzigghiu Nazziunali dî Ricerchi), l'Universitati di Catania e li sperti di la Suprantinnenza pû Patrimoniu Curturali di Girgenti.

L'arricerca, chi vinni pubbricata nne Microchemical Journal (Jurnali di Micruchìmica n sicilianu), n'ammustra ca la viticurtura e la pruduzzioni dû vinu n Italia nun accuminciaru ntall'Etati dû Bronzu (comu li studiusi avìanu cridutu nzinu a tannu) ma cchiù assai di 2000 anni avanti. A cunfirmari chista tesi, ci sunnu macari li sustanzi chimichi chi vìnniru ritruvati supra a n'àutra giarra ca fu truvata dintra a na grutta dû Munti Kroniu e chi arrisali ô IV seculu a.C.: chista terracotta, chi nun fu smartata, sarbau tracci di du' sustanzi naturali chi si ponnu truvari ntâ racina e chi fannu parti dû prucessu di vinificazzioni: l'àcituu tartaricu e lu so sali judiatu.

Nun è sempri ca succedi ca s'arrinesci a ditirminari la giusta cumpusizzioni di chisti fezzi, pi' farilu e’ nicissariu ca li vasi sunnu ancora sani. Nta 'stu mumentu, li ricircatura vonnu jiri avanti cu la so ricerca pi' vidiri si arrinèscinu a capiri si chistu vinu era jancu o russu.

Traduttu di: Franciscu Prucopiu


Licenza Creative Commons

mercoledì 14 giugno 2017

Sciarra 'ntra Ismaeli La Vardera e Binignu, lu cannidatu a sìnnacu finisci ô spitali


Urigginali di Gnazziu Marchisi (taliànu: Ignazio Marchese) - 15 giugnu 2017 - Funti: BrogguSicilia

Finìu a sciarra cu Ismaeli La Vardera, cannidatu a sìnnacu di lu muvimentu "Nuatri cu Sarbini" (taliànu: Noi con Salvini) e Franciscu Binignu, l'atturi di Mery pi' sempri (taliànu: Mery per sempre) puru iddu cannidatu a lu cunzigghiu cumunali di la stissa lista.
Nni la sidi di lu cumitatu litturali di la dritta a la via Ausonia stavanu facennu 'na 'ntirvista quannu pi' mutivi ca ancora s'ànnu a capiri i dui si pigghiaru a lignati.
Di la sciarra si nni niscìu cchiù azzaccagnatu lu cannidatu sìndacu ca ora è a lu spitali di Villa Sufìa cu lu cuddaru nnô coddu ca aspetta ca lu vìsitanu e ca ci dìcinu la prògnusi.
Appena si chiudi lu pircursu di lu spitali, lu cannidatu di la dritta àvi a prisintari 'na dinunzia contra all'atturi: accussì accirtaru li carrubbinera di lu Ripartu Radiumòbbili ca stannu circannu di capiri chiddu chi successi.
Stasira, chiddu chi dìcinu li carrubbinera, ci fu 'na sciarra 'ntra chisti dui, cu La Vardera ca finìu a lu spitali puru cu lu cuddaru. Binignu pirò nijau ca tuccau a l'ex Iena.
Pari ca la sciarra ci fu pi' curpa di certi arripigghiamenti ca La Vardera ci dissi di fari a dui upiratura: chisti arripighiamenti ci dèttiru fastìddiu a Binignu e a la so cumpagna e pari ca idda fu ammutatta di l'upiratura e sbattìu nni la scrivanìa.
Accussì accuminciau la sciarra. Li carrubbinera si tìnniru a Binignu pi' fàrici diri zoccu successi, mentri La Vardera nun vosi diri nenti, dicennu ca "parrirà cu li so' avvucati". 'Na juncitina ca finìu nni la pèggiu manera.

Traduciutu di: Ridazzioni


Licenza Creative Commons

martedì 4 aprile 2017

Tunnu Giueni: cunfusiuni tutali. Tràficu paralisatu dî travagghi pâ funtana

4 aprili 2017 - Funti: hashtagSicilia

Manicòmiu tirrìbbili a Catania: ma chi succidìu arreri? Accuminciaru li travagghi pi' assistimari la vista dû muru di cimentu dû Tunnu Giueni.

Si tratta di 'ddu muru grìggiu ca fa di basi ô Parcu Giueni doppu ca lu ponti fu jiccatu 'n terra. Un carteddu ca cci avìa misu quarchidunu 'ntirpritau la pinzata ca àppiru tutti li catanisi câ frasi "Bedda minchiata". Ora stannu circannu d'assistimari armenu pâ vista, ca a Catania è la cosa cchiù 'mpurtanti!

La matina dû 20 di marzu, nnâ banna davanzi lu muru, cci foru misi li transenni pi' fàrici fari lu canteri ê muratura. D'arreri ê transenni cc'èranu camiuna e àutri strumenti ca sirbèvanu pi' travagghiari. S'ànnu a arringraziari all'aggenti dâ circulazzioni ca 'ntìsiru li dispusizzioni e fannu addivintari li prubbremi ca porta 'ddu canteri misu ddocu cchiù leggi, senza ca si po' fari cchiù assai e a 'na manera disastrusa pû tràficu dâ circunvallazzioni.

L'aggenti sicuru arrispirirannu vilenu pi' tuttu lu tempu dû sirbizzu, vistu ca li màchini passanu lenti e su' assai, stannu 'n fila pi' minuti e minuti aspittannu ca si rapri un passaggiu. S'àvi a vìdiri chi dìcinu li sinnacati dû sitturi.

Ma prima di "sbàttiri lu mussu" unni cc'è lu canteri, cu' acchiana dâ Via Ittinea e voli pigghiari la strata pâ via dû Voscu o cu' veni di Ugnina versu Nèsima o Mustarjancu o puru cu' scinni dâ via Petra di l'Ova pi' pigghiari la circunvallazzioni, si trova di davanzi 'na longa fila di màchini, ognuna ca voli jiri unni àvi a jiri.

Fu dittu ca li travagghi avìssiru a finiri pâ fini dâ stati. Quannu finìscinu cu 'ddu muru, li tènnici dìcinu ca la funtana avissi a fari pendant cu "L'acqua ô linzolu", la cumpusizzioni classica 'ncapu ô ciumi Aminanu nnâ chiazza dû Domu. Ggià ni 'mmagginamu li purmini chî turisti ca ànnu a arrivari pi' vìdiri 'stu novu capu d'opra (taliànu: capolavoro) di l'arti, macari purtati di l'assissuri pâ biddizza spartuta! O no?

Traduciutu di: Kenan Di Grazzia/Ridazzioni



Licenza Creative Commons

martedì 20 dicembre 2016

Tirruri a Birlinu, camiuni 'ncapu ê genti: armenu 9 vìttimi. La pulizzia: è attintatu. 'N'autista arristatu, 'n'àutru murìu

19 dicèmmiru 2016 - Funti: Jurnali di Sicilia

BIRLINU - Lu spiddu di 'n'attintatu comu a chiddu assai ladiu di Nizza si fici vìdiri ntô menzu di Birlinu. Un camiuni irrumpìu nta un mircatinu di Natali chinu di birlinisi e turisti, nnô centru cummirciali e dî spisi dâ capitali tidisca, nnâ simana di Natali.

Lu valanzu (taliànu: bilancio) accamadora sicunnu la pulizzia è di 12 morti e armenu 48 firuti, certuni su' gravi e arrischianu di mòriri. Sicunnu la pulizzia nnô camiuni cc'èranu du' cristiani: 'n'omu suspitattu di èssiri chiddu ca lu purtava fu arristatu e accamadora ci stannu facennu li dumanni.

La pulizzia, ca ancora sta accura pâ matrici tirruristica di chiddu ca successi, voli capiri si fu propiu 'n'attintatu. Ca è la cosa cchiù sicura ma nnô so cuntu Twitter scrivi (puru nnô 'ngrisi) ca "li mutivi di chiddu ca successi ancora nun su' chiari".

La cualizzioni dî milizzi di l'Iracchi, ca cummàttinu contra ô califfatu, nna un missaggiu nne Twitter dìcinu ca li canali di l'Isis ggià si rivinnicaru l'attintatu. Lu sicunnu omu ca era assittatu ô latu di chiddu ca purtava lu camiuni, 'mmeci, murìu pi' curpa dû scontru; chistu è chiddu chi dissi lu purtavuci dâ pulizzia di Birlinu, ca dissi puru ca fu truvatu mortu dî succurritura.

'N menzu ê primi riazzioni pulìtichi ci fu chidda di Angela Merkel ca attraversu lu so purtavuci Steffen Seibert si dissi "alluccuta" pû pussibbili attintatu a Birlinu. Nnô so cuntu Twitter Seibert scrissi: "Semu a luttu pî morti e spiramu ca l'assai firuti si ponnu aiutari". Lu ministru dû 'Nternu Thomas de Maizière è 'n cuntattu cull'auturitati di sicurizza di Birlinu e uffrìu "l'aiutu dâ pulizzia fidirali".

Doppu assai allarmi e 'na para d'attintati sbintati, l'ìncubbu di 'n'attaccu ca putìa fari assai morti successi propiu nna unu di l'ubbittivi ca èranu cunsidirati cchiù piriculusi nna 'stu pirìudu, un mircatinu di Natali. Sicunnu chiddu ca ricustrueru li jurnalisti, lu camiuni cumparìu allazzu nnâ Breitscheidplatz, ê pedi dâ "Gedaechtniskirche", la chesa dû ricordu, nnô cori dâ parti uccidintali di Birlinu vinennu dâ stazzioni dû Zoologischer Garten.

Pigghiau 'n chinu li casuzzi di lignu dû mircatinu e li birlinisi e li turisti ca a 'dd'ura èranu ê bancareddi. Ddocu arrivaru assai òmini dî forzi di succursu e di sanitari ca stannu aiutannu li firuti ca ancora su' sdivacati nnô marciapedi. L'ammulanzi su' pustiggiati nnô bordu dâ chiazza.

Li 'mmaggini arripigghiati di luntanu dû canali N24 fannu vìdiri li firuti purtati nnê littuzzi (taliànu: barelle). Tutti li strati tunnu la chiazza dû mircatinu di Natali su' bruccati dî forzi di l'ùrdini. La Breitscheidplatz è a du' passi dâ Kurfuerstendamm assai friquintata, la strata principali dî spisi e dû Kadewe, lu granni magasenu di Birlinu e ô latu all'Europa Center, unu dî centri cummirciali cchiù canusciuti e storici dâ citati.

Lu sìnnicu di Birlinu, ca arrivau subbitu unni cci fu l'attintatu, parrau di "allucchimentu pâ citati e pî genti ca si truvàvanu cca pi' passàrisi 'na 'nticchia di tempu 'n paci".

Traduciutu di: Ridazzioni.


Licenza Creative Commons

venerdì 9 dicembre 2016

Umicìdiu di Lintini, giùvini firmatu a Catania: la droga pussibbili mutivu

2 dicèmmiru 2016 - Funti: Jurnali di Sicilia

SARAÙSA - Un picciottu di 27 anni di Lintini, Giùnata Parcedda (taliànu: Johnatan Parcella), fu acchiappatu dî carabbinera pill'umicìdiu di Ardu Panareddu (taliànu: Aldo Panariello), ajeri matina â via Tuletu (taliànu: via Toledo), sempri a Lintini, mentri ca era cu so muggheri ntâ màchina.

Parcedda, ca fu pigghiatu mentri era a Catania, fu purtatu â caserma a Lintini unni ci fu dittu lu pruvvidimentu di Margarita Brianisi (taliànu: Margherita Brianese), ca è la sustituta dû prucuraturi di Saraùsa e ca cuurdinau li 'nnàggini.

Lu picciottu sgarrau ggià câ liggi nnô passatu pi' curpa dû spacciu.

E sicuru propiu pî quistioni piriculusi di spacciu, sicunnu li 'mmistigatura, nascìu la pinzata d'ammazzari a Panareddu cu quattru corpa di pistora.

Parcedda fu purtatu 'n carciaru a Catania.

Traduciutu di: Kenan Di Grazzia



Licenza Creative Commons

domenica 4 dicembre 2016

Lu sicilianu Parmitanu putissi turnari ntô spazziu nnô 2019

2 dicèmmiru 2016 - Funti: Jurnali di Sicilia

ROMA – L'astrunàuta sicilianu Luca Parmitanu (taliànu: Luca Parmitano) fu prupostu pi' turnari a vulari nnô 2019 nnâ Stazzioni Spazziali 'Ntirnazziunali. S'aspetta la dicisioni sicura nnâ primavera 2017. L'annunziò lu diritturi ginirali di l'Agginzìa Spazziali Urupèa, Jan Woerner, â cunfirenzaministiriali di l'ASU ca finisci stajurnata nnâ Svìzzira, a Lucerna.

La dicisioni furmali àvi a siri pigghiata nnâ primavera 2017 dû principali foru (taliànu: forum) pû cuurdinamentu e la risuluzzioni dî quistioni rilativi ô quipaggiu dâ stazzioni spazziali, lu Pannellu Murtilatirali di l'Upirazzioni dû Quipaggiu ('ngrisi: Multilateral Crew Operations Panel, MCOP). Luca Parmitanu, ca ggià vulau nnô 2013, ricivìu la Midagghia di Sirbizzu Illustri ('ngrisi: Distinguished Service Medal) comu mèritu pû sangu friddu ca addimustrò duranti la passiata spazziali ca fu firmata pi' curpa dî pèrditi d'acqua nnô cascu.

'Na duppia cunferma dû rolu di l'Itàlia nnô spazziu urupèu e dâ granni priparazzioni di l'astrunàuta: chistu chiddu chi dissi lu prisidenti di l'Agginzìa Spazziali Taliàna (ASI), Rubbertu Battistuni (taliànu: Roberto Battiston), ca cummintau la cannidatura di Parmitanu pi' 'na nova missiuni nnô 2019 nnô campu d â Cunfirenza Ministiriali di l'Agginzìa Spazziali Urupèa ('ngrisi: European Space Agency, ESA) ca si chiudi stajurnata a Lucerna.

Battistuni dissi ca "Luca Parmitanu è 'n'omu spiratu (taliànu: ispirato) ca addimustra comu li pirsuni ponnu supirari tutti l'ustàculi". Juncìu ca “chista sicunna pussibbilitati di vulari pi' Luca cunferma ca lu so àutu livellu di priparazzioni e la 'mpurtanza dû rolu taliànu nnall'ASU, nnê circati nnô spazziu e nnâ scienza".

Traduciutu di: Dàvidi Migghiazzu.


Licenza Creative Commons