mercoledì 6 maggio 2015

Expo, fallimentu pavigghiuni BioCluster - La Riggiuni: la Sicilia cessa l'attivitati



Urigginali di Giacintu Pipituni (taliànu: Giacinto Pipitone) - 6 maiu 2015 - Funti: Jurnali di Sicilia

PALERMU - La Riggiuni suspenni tutti l'attivitati ca sta facennu e puru chiddi prugrammati pî pròssimi jorna nnô BioCluster Miditirràniu, lu pavigghiuni di l'Expo ca metti 'nzemmula li paisi ca su' vagnati di 'stu mari. Fu un tronu di l'aria ca l'assissuri ê Risorsi agriculi, Ninu Caleca, annunziò doppu 'na jurnata di tinzioni troppu forti.

'N manera furmali la dicisioni fu pigghiata di Dariu Cataviddotta (taliànu: Dario Caltabellotta), lu diriggenti ca curò lu pavigghiuni 'nzinu a ajeri. Cataviddotta rilivò ca "ô pruggettu Cluster adireru assai azzienni e tirritorî ca stannu subbennu 'n dannu cunomicu e di 'mmaggini pi' tuttu lu tissutu pruduttivu sicilianu". 

Àvi jorna ca si sannu li prubbremi. E la Riggiuni li metti 'n fila nnâ nota ufficiali mannata ê vèrtici di l'Expo: manca la cupirtura nnâ banna du parcu, manca la visibbilitati dû pavigghiuni, mancanu li signala, la pulizzia putissi essiri puru ca nun cci è e suprattuttu nun cc'è lu culligamentu a internet.

Pi' tutti 'sti mutivi Cataviddotta rileva ca "nun cci su' li cunnizzioni ca cunsèntinu la riulari rializzazioni dû palinsestu di l'attivitati". Di cca la dicisioni di "suspènniri tutti l'attivitati di l'ària cumuni 'nzinu a quannu li prubbremi signaliati nun su' misi ô postu e puru l'atti nicissarî a garantiri la sicurizza di l'upiratura e dî visitatura".

La littra di Cataviddotta fu mannata ora ora ô cummissariu ginirali di l'Expo, Giuseppi Sala (taliànu: Giuseppe Sala), e ô diritturi Divisioni participanti Stefanu Jatti (taliànu: Stefano Gatti).
Finu a cca lu testu ufficiali. Ma Caleca juncìu ca "la dicisioni di Cartabellotta ancora nun fu cuncurdata ne cû prisidenti dâ Riggiuni, ne cu mia e mancu cû curdinaturi dû cumitatu di cuntrollu. E cumunqui nun vogghiu spènniri picciuli pubbrici". È lu signali ca sicuru cci sarannu discussioni pâ Riggiuni pagaricci tri milliuna all'Expo pâ gistioni di lucali.

Caleca aveva svriugnatu lu diriggenti riggiunali ca ajeri aveva dittu ca aveva statu iddu ca aveva dumannatu l'istituzzioni di 'na cummissioni. "La gistioni dû Cluster Biu-Miditirràniu si rivilò subbitu scadenti pi' tutti li cosi. La cummissioni numinata ora ora, di 'ntisa cû prisidenti Crucetta (taliànu: Crocetta), è p'accuminciari 'na cummissioni spittiva ca lu rispunsabbili dû Cluster Dariu Cataviddotta nun dumannò mai".

"Lu cummissariu Dariu Cataviddotta nun l'aveva a accittari assulutamenti la cunzigna dû BioCluster senza finutu lu jornu prima dâ naugurazzioni all'Expo e aveva a isari 'na chiara cuntistazzioni. Nun lu fici: cu' sgarrò uvviamenti hâ pagari e nun facemu scunti a nuddu". Accussì lu guvirnaturi dâ Sicilia, Rusariu Crucetta, palori ca fannu putizzari 'n pruvvidimentu 'mminenti. "'Ncapu â rispunsabbilitati dî ritardi - unci Crocetta - diggià fu criatu 'n cumitatu spittivu ca hâ valutari l'atti accura. Lu Cluster nun è gistutu direttamenti dû dipartimentu Agricurtura, ma la gistioni fa capu a Cataviddotta, ca fu numinatu nna 'ddu rolu di l'ex assissuri all'Agricurtura Izzichìa Riali (taliànu: Ezechia Reale)".

"Lu BioCluster - cuntinua Crucetta - nun è lu Pavigghiuni Sicilia, chiddu funziona dû primu jornu, ci su' 'mprisi ca stannu spunennu e stannu facennu puru boni cuntratti, di dintra ci su' puru riperti archiuluggici di livellu assai granni e semu 'ntra 'i picca, l'àvutri si limitanu a spòniri futugrafìi". "Lu BioCluster - pricisa Crucetta - è 'na nizziativa di gistioni di 'n appartu pâ spusizzioni dî varî Paisi dû Miditirràniu, la Sicilia aveva participatu prima dû 'nsidiamentu di l'attuali assissuri all'Agricurtura, Ninu Caleca". E unci: "Finèmula cu l'attacchi ô Pavigghiuni Sicilia, ca nun cci trasi nenti, cu' cuntinua a cunfunnìrisi dammaggia 'a 'mmaggini dâ Sicilia".

Traduciutu di: Ridazzioni.

[canciatu lu 29 nuvèmmiru 2016]


Licenza Creative Commons